فنون

ياسمين صبري: بخاف من الظلام والمرتفعات ولا أشاهد أفلام الرعب


إسراء زكريا


نشر في:
الثلاثاء 27 سبتمبر 2022 – 9:00 ص
| آخر تحديث:
الثلاثاء 27 سبتمبر 2022 – 9:01 ص

قالت الفنانة ياسمين صبري: “عندي فوبيا من الضلمة، مش بحبها خالص، وبقعد أفسر الموضوع بيني وبين نفسي، وبحس إن الظلام حاجة مجهولة، ومش بتفرج على أفلام رعب، وآخر مرة اتفرجت على فيلم رعب كنت طفلة، ولما بشوفها بقلب بسرعة”.

وتابعت خلال حلولها ضيفة مع الإعلامية إسعاد يونس ببرنامجها “صاحبة السعادة” على قناة دي إم سي: “باخد بالي أنا بدي لعقلي إيه، وعيني بتشوف إيه، باخد بالي من كل حاجة، ولا بشوف حوادث، ولا فيديوهات مأساوية، أو أي حاجة بتشد الأعصاب، وبشوف اللي أنا عايزاه على السوشيال ميديا”.

وأضافت : “أنا بسافر كتير وبركب طيارات، وفي أي مطب كف إيدي بيعرق وأعصابي بتتشد، ولما بكون في حاجة عالية أوي أو جبال مثلا، باخد نفس طالع داخل عشان أهدى، مع إني بعمل فيديوهات وكل حاجة، لكن من ورا الكاميرا متوترة جدا، ومش عارفة أكسر حاجز الفوبيا من المرتفعات”.

واستكملت: “زمان مكنش عندي مشكلة مع المرتفعات، ولو حصل إيه في الطيارة عادي، كنت بعمل إعلان، واقترحوا عليا أنط ببانجي جنب، مكنتش عارفة أخد نفسي وبصرخ، نزلوني، وطلبوا مني إني أعيد المشهد تاني، وجالي تروما مش عارفة اتخطاها”.