– يجز وعفروتو بيعجبوني.. ومعندناش مشكلة نعمل ديو مع مطربي الراب
وأضاف بحر، في تصريحات خاصة لـ«الشروق»، أن تعاون فرقة “بلاك تيما” مع الكينج محمد منير في حفلته الأخيرة جاء صدفة، قائلا: «التعاون بينا وبين الكينج محمد منير كان عن طريق واحد صاحبنا، هو رشحنا لمنظمين الحفلة أننا نكون موجودين، وهما عرضوا الفكرة على الكينج وهو رحب بوجودنا معاه، ودي حاجة في التاريخ كبيرة بالنسبة لنا، أننا نغني معه وده كان حلم حياتنا واتحقق الحمد لله، وأتمنى يكون في تعاون غنائي بين فرقة بلاك تيما والكينج منير».
وعن سر ابتعاد فريق “بلاك تيما” عن الألبومات، قال: «هو خلاص مبقاش في حد بيعمل ألبومات، السوق بقى بيجبرك تعمل أغاني سينجل، وأنا شخصيا مع الناس اللي بتحب الألبوم لأنه بيوثق تاريخ، والتاريخ بيفتكر الألبومات ومبيفتكرش الأغاني السينجل، فأتمنى أن موضة الألبومات ترجع تاني، رغم أنها مكلفة عن الأغاني السينجل لكنها بتكون حالة على بعضها، ولو عملنا ألبوم ونزل بطريقة السينجل هيكون طعم الألبوم راح، والأفضل أننا نركز في أغنية واحدة وننزلها، لكن الألبوم لوحدة حالة بتعيش الجمهور فيها، الحالة الرومانسية والحالة الإنسانية، والحالة السعيدة، بتاخد الباكيدج بتاع الألبوم كله، لكن السينجل بتختار أغنية اللي لايقة على السوق بتعملها وده بيظلم الأغاني».
وعن رؤيته لأغاني الراب والتراب في مصر، أكد أنه يحب أغاني الراب، حيث يعشق هذا النوع منذ سنوات شبابه، متابعا: “جودة الأغاني والمزيكا الراب والتراب في مصر بقت أحلى، غير زمان لأن الإمكانيات ضعيفة وقتها، لكن الموضوع دلوقتي حلو، بس عجباني حاجات كتيرة أوي بسمعها، ومعندناش مشكلة نعمل ديو مع مطربي الراب، وفي ناس في مصر بيعجبوني في الراب زي ويجز وعفروتو وهما حلوين وشاطرين جدا، وبنفكر ممكن نعمل حاجة راب بس بنشوف لسه حاجة تكون مناسبة لينا، والكيمياء اللي بينا وبين اللي هنقدم معاه الديو مهم جدا».