منة فضالي: والدي سابني وأنا عندي شهرين وكان نفسي أعرف ليه

تحدثت الفنانة منة فضالي عن طفولتها، وكيف عانت بسبب عدم وجود والدها في حياتها، وتركها عندما كانت بعمر شهرين فقط.

واستكملت منة فضالي خلال حديثها مع الإعلامية أميرة بدر في برنامج “Vip” المذاع على شاشة “هي”: “طبعا كان بيأثر في البداية طفولتي إن والدي مش موجود، ولكن ماما كانت مالية الفراغ.. وشغلالي دماغي ومش بقعد في البيت لوحدي.. وجدتي وجدي وخلاني معايا ديمًا.. ولما كنت بسأل عن بابا كانت بتقولي ماما: مسافر .. شغله بره مش موجود”.

وتابعت: “عارفة شكله وبشوف صوره، كنت بشوف زمايلي في المدرسة بيبقى معاهم باباهم ومامتهم وأنا معنديش بابا وكان بيضايقني الموضوع ده جدًا، ولكن اختلف الموضوع لما كبرت بقيت أشوف الدنيا بشكل تاني”.

وأضافت: “الموضوع صعب جدًا بالنسبة للبنت لأن البنت بتحتاج لسند ولحضن يحسسها بالأمان، ولما يبقى عندها مشكلة في المدرسة ترجع لباباها مش مامتها، كنت ديمًا بلجأ لجدي وهو كان مدلعني أوي وأنا صغيرة، حتى لما كنت بتعب بنده لماما وأقولها: عايزة أشوف بابا، طبيعي كانت واحدة صغيرة في مدرسة عايزة باباها”.

وقالت: “كنت بتكلم مع بابا وأنا صغيرة بس كل فين وفين، وكان بيقولي مشغول ومسافر وعندي شغل، مكنتش هفهم الكلام ده وأنا صغيرة بس كنت بتضايق، وأنا كل شوية بسأله هتيجي إمتى؟ وأنا مكنتش أعرف إنهم منفصلين، سابني وأنا عندي شهرين أو تلاتة، أنا نفسي أعرف ليه؟ بس خلاص متأخر دلوقتي”.

وتابعت: “لما كبرت وبدأت اشتغل عرفت إن ماما اتطلقت وعرفت بعد وقت طويل، هي كانت أول زوجة له، وقعدوا مع بعض 12 أو 13 سنة، أنا جيت بعد معاناة طويلة لماما في الخلفة، وكانت بتسقط كتير جدًا”.

وأردفت: “تعبت عشان تجيبني وجالها حمى نفاس وكانت هتموت وحاجات كتير، أمي مرتبطة بي زيادة عن اللزوم وأنا كمان، ماما وبابا كانوا بيحبوا بعض جدًا، ولحد دلوقتي فيه بينهم احترام، ووالدي من عيلة كبيرة جدًا، مثقف ومتعلم تعليم عالي، وطباخ كويس جدًا”.

واختتمت: “الأول كان الموضوع بالنسبة لي كره عشان كان موجود ومش موجود، ولكني كنت شايفه إنه مش موجود بإرادت، وإنه كان موجود وهو اللي مش عايز يكون موجود كانت تعباني نفسيًا”.