تجديد إيداع صبي فقع عين صديقه بسبب 5 جنيهات في العمرانية 15 يوما

• المتهم للنيابة: كنا بنهزر وضربته بزجاجة ولقيت وشه كله دم

حصلت “الشروق” على نص اعترافات طالب فقع عين آخر باستخدام زجاجة وأحدث بها عاهة مستديمة بسبب 5 جنيهات في منطقة العمرانية.

وأمرت نيابة الطفل بالجيزة تجديد إيداع المتهم 15 يوما داخل إحدى دور الرعاية الاجتماعية، وطلبت النيابة تحريات المباحث حول الواقعة وملابساتها، مع بيان قصد المتهم من ارتكاب الواقعة تحديداً.

وباشرت النيابة التحقيقات في القضية والتي تحمل رقم محضر 12550 لسنة 2023 جنح الطفل بالجيزة، بعدما استمعت لاعترافات المتهم وأقوال والد المجني عليه.

ووجهت النيابة للمتهم تهمة التعدي بالضرب على المجني عليه فأحدثت به الإصابات الموصوفة بالتقرير الطبي والتي نتج عنها عاهة مستديمة يستحيل برؤها وكان ذلك باستخدام أداة “زجاجة”

– اعترافات المتهم “ع” 14 عاما طالب

قال: “اللي حصل إن أنا والمجني عليه أصحاب من ثلاث سنوات وكنا متفقين نتقابل ونروح السايبر علشان نلعب ومفيش بنا أي خلافات وكنا بنهزر مع بعض، وأنا أخدت منه خمسة جنيهات وهو أخد مني الكاب بتاعى، ولما خلصت لعب الجيم خرجت وراه وقلت له هات الكاب، فمرديش، فقعدنا نشده من بعض وبعد كده الهزار قلب بجد”.

وتابع: “قعدنا نشد الكاب من بعض لحد مأنا أخدته منه، راح هو مسك إزازة وخبطني بيها في مناخيري، وأنا نزفت منها روحت أنا لقيت إزازة على الأرض وكانت مكسورة وخبطه بيها في دماغه ضربة واحدة فلقيت وشه كله دم”.

واستطرد: “رحت جريت على البيت وبلغت أهلي باللي حصل، وبعدين هما راحوا علشان يشوفوا القصة وبعدها بنص ساعة لقيت قوة أمنية من مباحث العمرانية جت خدتني من البيت وهو ده كل اللي حصل، بس أنا مكنش قصدي أعمل كل ده، أنا ضربته ضربة وجت في وشه ومعترف إن أنا غلطان”.

– أقوال والد المجني عليه “ر” 52 عاما

قال: “اللي حصل أنا كنت نايم في البيت لقيت عيل صغير من الشارع جه خبط على البيت وصحاني وقالي الحق ابنك اتعور، فخدت بعضي وجريت وسألت عليه قالولي ابنك راح مستشفى أم المصرين ورحت جري لقيته هناك”.

وتابع: “قالولي خده على مستشفى مصر الدولي للعيون علشان ابنك عينه ضايعة، ولما روحنا هناك فضلنا قاعدين شوية راحوا قالولنا روح على قصر العيني بسرعة ولما روحنا القصر سألته إيه اللى حصل، قالي إن المتهم وأنا شغال جه خطف من إيدي فلوس وجرى، وعلشان هو صاحبه سابه ولما شافه بالليل راح ابني خد من على دماغه الكاب وقاله هات فلوسي، خد الكاب راح الواد مغفل ابني وراح ماسك إزازة مكسورة من على الأرض وراح ضارب بيها ابني في وشه وضيع عينه وهو ده كل اللي حصل”.

– التقرير الطبي

وتبين من التقرير الطبي، إصابة المجني عليه بقطع في الجفن الأيسر السفلي، وتم إجراء جراحة لإصلاح الانفجار، وشدد على الالتزام بالعلاج الموصوف والمتابعة بالعيادات الخارجية والراحة التامة لمدة شهر، وتبين أن العين لا ترى الضوء، وقد تم إصلاح القطع بالجفن السفلي.

– بلاغ إلى القسم

تلقى قسم شرطة العمرانية، إخطارا من مستشفى أم المصريين، بوصول طالب ومقيم بمنطقة العمرانية مصابا بجرح قطعى ونافذ بقرنية العين وخروج عدسة العين ادعاء تعدى.

وانتقل ضباط مباحث القسم إلى مكان البلاغ، وبالفحص تبين حدوث مشادة كلامية بينهما تطورت إلى مشاجرة، تم ضبط المتهم، وبمواجهته اعترف بارتكاب الواقعة وحرر محضر بالواقعة وجارى العرض على النيابة العامة لمباشرة التحقيقات.